Туман –
нібыта ў Лондане,
Не прычакаць зары,
Прахожы пройдзе – лорд міне,
Схаваны ў каўняры.
Стаў незнаёмы горад нам,
Дзе мелі разам жыць …
Туман гусціцца, холадна,
І дожджычак імжыць.
Аўтобус перапоўнены,
Гадзіну стой, макрэй.
Але таксіст
прыпомніў нас:
«Хэло! Сюды!.. О’кэй!»
«А вы ўсе – непаседамі?» –
шафер нациснуў «газ».
Ён добры. Ён не ведае,
Што разлучае нас.
Рука ў руцэ … Ты гордая,
Твой дом святлом гарыць.
Ну, а ў мяне
ёсць горад мой,
Дзе ёсць мае сябры.
Не ўцешымся маўчанкаю,
Бо і яна міне.
Сапраўднай англічанкаю
Ты стала для мяне.
Ні ў чым не вінаватая,
Дарунку не прасі.
… Пайшла, сваім занятая.
Сядаю я ў таксі.
Туман. Шарэе раніца.
Рабочы гул і трэск.
Гані, таксіст. Пытаецца:
– Табе куды?
– У Брэст!